Un omaggio deve andare al grande Mario Merola, "the last of the singers in a jacket" (come riporta il Columbian), che in un modo o in un altro ha reso popolare la musica italiana-partenopea nel mondo...


'O Zappatore

Felicissima sera,
a tutte sti signure 'ncruvattate
e a chesta cummitiva accussí allèra,
d'uommene scicche e femmene pittate!

Chesta è na festa 'e ballo...
Tutte cu 'e fracchesciasse sti signure...
E i', ca só' sciso 'a copp''o sciaraballo,
senza cercá 'o permesso, abballo i' pure!


Chi só'?...
Che ve ne 'mporta!
Aggio araputa 'a porta
e só' trasuto ccá...

Musica, musicante!
Fatevi mórdo onore...
Stasera, 'mmiez'a st'uommene aligante,
abballa nu contadino zappatore!

No, signore avvocato...
sentite a me, nun ve mettite scuorno...
Io, pe' ve fá signore, aggio zappato
e stó' zappanno ancora, notte e ghiuorno!

E só' duje anne, duje,
ca nun scrive nu rigo â casa mia...
Si 'ossignuría se mette scuorno 'e nuje...
Pur'i' mme metto scuorno 'e ...'ossignuría"

Chi só'?!
Dillo a 'sta gente
ca i' songo nu parente
ca nun 'o può cacciá...

Musica, musicante!
ca è bella l'allería...
I' mo ve cerco scusa a tuttuquante
si abballo e chiagno dint'a casa mia!

Mamma toja se ne more...
'O ssaje ca mamma toja more e te chiamma?
Meglio si te 'mparave zappatore,
ca 'o zappatore, nun s'a scorda 'a mamma!

Te chiamma ancora: "Gioja"...
e, arravugliata dint''o scialle niro
dice: "Mo torna, core 'e mamma soja,
se vene a pigliá ll'ùrdemo suspiro..."

Chi só'?
Vuje mme guardate?
Só' 'o pate...i' sóngo 'o pate...
e nun mme pò cacciá!...

Só' nu fatecatóre
e magno pane e pane...
Si zappo 'a terra, chesto te fa onore...
Addenócchiate...e vásame sti mmane!